ნაზრანში, შინაგან საქმეთა სამმართველოს ნანგრევებში ჩარჩენილი 9 თანამშრომლის ძებნა გრძელდება. მიმდინარეობს გამოძიებაც. წინასწარი მონაცემებით, ორი დღის წინ, ინგუშეთის დედაქალაქში მილიციის სამმართველოს აფეთქებისას 24 ადამიანი დაიღუპა. აფეთქება იმდენად ძლიერი იყო, რომ 10 ცხედრის იდენტიფიცირება ჯერაც ვერ ხერხდება. გამოძიებისთვის ჯერჯერობით ცნობილია მხოლოდ ის, რომ სამმართველოს ეზოში გაზელის მარკის ყვითელი ფერის ავტომობილმა ჭიშკარი შეანგრია. რამდენიმე წუთში კი აფეთქების ხმა გაისმა. ასაფეთქებელი მოწყობილობა ავტომანქანაში იყო დამონტაჟებული. რუსი სამართალდამცველების ინფორმაციით მოწყობილობისთვის 400 კილოგრამი ტროტილი გამოიყენეს. მომხდარის შემდეგ ინგუშეთის შს მინისტრი თანამდებობიდან გადადგა. გუშინ კი, რუსეთის პრეზიდენტმა მის ნაცვლად მოსკოველი მოხელე დანიშნა. ანალიტიკოსთა ვარაუდით, ეს ნაბიჯი მიუთითებს, რომ ინგუში სამართალდამცველების მიმართ მოსკოვის ნდობა საბოლოოდ ამოიწურა.