2009-08-20 12:12 - არჩევნები აფეთქებების მოლოდინში

ავღანეთში, საპრეზიდენტო არჩევნების წინ. უსაფრთხოების ზომებისა და პატრულირების გაძლიერების მიუხედავად, თალიბებმა დედაქალაქ ქაბულში რამდენიმე აფეთქების მოწყობა მაინც მოახერხეს. დებატების შედეგების მიხედვით, საპრეზიდენტო კანდიდატებს შორის ლიდერობას მოქმედი პრეზიდენტი ინარჩუნებს. თუმცა, რთულია თქმა, მოახერხებს თუ არა ის არჩევნებში ხმათა იმ რაოდენობის მოგროვებას, რომ მეორე ტური აუცილებელი აღარ გახდეს. მის მხარეზეა გენერალი დუსტუმი. ავღანეთში ერთ-ერთი ყველაზე გავლენიანი საველე მეთაური. ის სპეციალურად დაბრუნდა თურქეთიდან იმისთვის, რომ ყარზაის დაუჭიროს მხარი. საგარეო საქმეთა ყოფილმა მინისტრმა აბდულა აბდულამ, რომელმაც ასევე დააყენა საკუთარი კანდიდატურა პრეზიდენტის პოსტზე, საარჩევნო მარათონს დამატებითი ინტრიგა შესძინა, მაგრამ მთავარ პრობლემად მაინც უსაფრთხოება რჩება. თალიბებმა პირობა დადეს, რომ ყველაფერს იღონებენ, რათა არჩევნების ნორმალურ მიმდინარეობას ხელი შეუშალონ. ავღანეთში 17 მილიონი ამომრჩეველია. 2001 წელს თალიბების რეჟიმის დამარცხების შემდეგ ეს ავღანეთის ისტორიაში მეორე არჩევნებია. პრეზიდენტის პოსტისთვის 30-ზე მეტი კანდიდატი იბრძვის.