2009-08-21 14:00 - ბესელიას საკურორტო თავისტკივილი

ეკა ბესელიას შვილსა და ძმას – რატი მილორავასა და სერგო ბესელიას ბრალი სისხლის სამართლის კოდექსის 239-ე მუხლით წაუყენეს. მათ და კიდევ ორ პირს – ვალერი კირვალიძესა და როინ ცაგარელს პოლიციის თანამშრომლებისთვის წინააღმდეგობის გაწევა და სიტყვიერი და ფიზიკური შეურაცხყოფის მიყენება ედებათ ბრალად. შსს-ს განმარტებით, „დასახელებულმა პირებმა 2009 წლის 19 აგვისტოს ქობულეთში სიტყვიერი და ფიზიკური შეურაცხყოფა მიაყენეს დავით ჯაფარიძეს. კონფლიქტი დაიწყო კაფე-ბარ ელზაში, რა დროსაც მას და მის მეუღლეს მიაყენეს სიტყვიერი შეურაცხყოფა. ინციდენტი გადაიზარდა ფიზიკურ დაპირისპირებაში, რის შედეგადაც კაფე-ბარ „ელზას“ თანამშრომლების მიერ გამოძახებული იქნა პოლიცია“. ეკა ბესელია შვილისა და ძმის დაკავებას პოლიტიკურ ანგარიშსწორებას უწოდებს.