2009-08-22 13:10 - იარაღის კონტრაბანდის ბრალდებით ქართველები დააკავეს

ფილიპინებში იარაღის კონტრაბანდის ბრალდებით პანამის დროშის ქვეშ მცურავი ხომალდი Captain Ufuk-ი დააკავეს. გემზე, რომლის კაპიტანიც სამხრეთაფრიკელია, 13 ქართველი მატროსი იმყოფებოდა. თუმცა, საგარეო საქმეთა სამინისტროში აცხადებენ, რომ დაკავებულთა შორის საქართველოს მოქალაქე მხოლოდ შვიდია. Captain Ufuk-ი პანამაშია დარეგისტრირებული. ის ფილიპინების პროვინცია ბატაანის სანაპიროსთან დააკავეს. ოპერაციაში ფილიპინების საბაჟო სამსახურის, სანაპირო დაცვის და პოლიციის ძალები მონაწილეობდნენ. სააგენტო "ესოშეითედ პრესის" ინფორმაციით, ფილიპინების ხელისუფლებამ გემზე 5 ყუთი აღმოაჩინა, რომელშიც "გალილის" სისტემის 50 ავტომატი, 45 ხიშტი და 120 ცარიელი მჭიდი იყო მოთავსებული. ინტერნეტგამოცემა ISRA.com-ის ინფორმაციით, გემი ნავსადგურში წინასწარი შეტყობინების გარეშე გამოჩნდა. რამაც ადგილობრივი საგადასახადო სამსახურები დააეჭვა. დოკუმენტების თანახმად, ტვირთი პორტ ბატანგაში უნდა გადაეტანათ, რომელიც სამხრეთ მანილაში, კუნძულ ლუსონზე მდებარეობს. ISRA.com -ის ინფორმაციით, ფილიპინების ხელისუფლება შიშობს, რომ იარაღი ამბოხებულთა დაჯგუფებისთვის ან რომელიმე ბანდფორმირებისთვის იყო განკუთვნილი. ინტერნეტგამოცემის ინფორმაციით, ეკიპაჟის ქართველი წევრები ინგლისურად ვერ საუბრობენ. მათ ვერც ტვირთის დანიშნულება ახსნეს და ვერც დოკუმენტაცია წარმოადგინეს, რომელიც ფილიპინების მხარეს სიტუაციაში გარკვევის შესაძლებლობას მისცემდა. ფილიპინების ხელისუფლება უკვე რამდენიმე ათეული წელია მუსლიმ და კომუნისტ ამბოხებულებს ებრძვის. ამ ბრძოლაში დაახლოებით 160 ათასი ადამიანი დაიღუპა. საქართველოს საგარეო საქმეთა სამინისტრომ საქმეში გარკვევა ამერიკაში საქართველოს საელჩოს და ვაშინგტონში საქართველოს საკონსულოს დაავალა.